الجــــــــــــــــــــــمــــــهــــــره
إيه بالله أخطوا والخطا اللي جابهم عين الصواب
مبطي وأنا أشوف الطمع يكشف رداهم وأستره
مايملي عيون الحسود بها لزمن غير التراب
ومن لايتوب من الخطا تحرم عليه المعذرة
اللي من أولها خراب أكيد تاليها خراب
والبندق اللي ماتثور في هدفها تذعره
ودك الا من جاتك الغلطة من الناس القراب
الصاحب اللي ماكسبت محبته ماتخسره
مشكلتي إني ماعرفت أحسب لصدتهم حساب
قلطتهم صدري على ذكري قصيد وحنجرة
صوت ٍ يصول بمنبره وخطاب مامثله خطاب
والطيبه اللي زعزعت صوت الخطيب ومنبره
مافيه دمع ٍ صوبوه أحبابي بوجهي وخاب
ولازرق حزني على غالي ولافج إنحره
كل الزهاب اللي معي ذكرى من أصحاب الزهاب
واللي بقالي من عذاب أشرس طريقي وأخطره
لأني تجنبت الغرق.. عديت من فوق السحاب
لأن أكثر أصحابي ورق..ماشفت للطيب إثمره
والله ماحطيت بين الحقد والخوه حجاب
حتى غدوا ربعي يحدوني على الضيق أشكره
البارحة ثارت علي رقاب وآوتني رقاب
البارحة ياثقل دم البارح ويامحقره
أهب ياوجه الحسد وشلون جمعهم وغاب
كيف السنين اللي عطتني بعثرتهم بعثره
أثر المصايب ماتجيك إلا من الناس القراب
وبهالزمن حتى الخوي اللي تثق فيه أحذره
لابارك الله في رفيق ٍ تزعله كلمة عتاب
ولاجمع الله الرجال اللي تفرقهم مره
عوّدت نفسي كل ماشددت لليمّه ركاب
ماصد وجهي عن طريق إلا لياجبت خبره
الصاحب اللي مايجي من صحبته غير العذاب
نذر ٍ علي إن ماهجرني وإلا أنا اللي ب أهجره
من يفتح لفرقاي باب أفك له عشرين باب
وإذا خويي مايقدر خوتي ما أقدره
إن روّحوا فأنا بري منهم ليوم الحساب
وإن جرحوا قولوا لهم ماحركوا فيّ إشعره
شفهم لهم حول السنه ولا خذوا مني جواب
أحسن دوا للي يحاول يستفزك تحقره
ماكنت أحاتيهم صغيّير ..عاد أحاتيهم شباب
الصاحب اللي ما أذخره لليوم الأسود ما أذخره
شفني جمعت أوراقهم بكتاب وأغلقت الكتاب
ياوقت لم اللي تلمه وأنثر اللي تنثره
اللي يخاف من الظما يترك لنا طرد السراب
واللي ماهو بقد الظلام ووحشته لايسهره
عقب اكتئاب البارحة ماعاد أنا حمل اكتئاب
الطيب جرجرني وأنا ماني بناقص جرجره
أنا تجرعت الظما لين أحترق وجهي وذاب
أنا كسرت بخاطري قبل الصداقة تكسره
أنا خسرت اللي غيابه غير عن كل الغياب
أنا غفرت لعالم ٍ ماتستحق المغفرة
أنا أكثر (إنسان) تعلم من كثر ما أخطأ وصاب
أنا أخر (لسان) يتكلم في زمان الثرثرة
أنا القصيد اللي فزع من دفتره مليون ناب
وأنا الوحيد اللي جمع مليون ناب بدفتره
جفني وجرّحه السهر ، حيلي وهدّته الصعاب
دمعي هدر،ضحكي ندر،عمري وضيعت أكثره
شيبت بعقول العرب..هيبت روس ٍ ماتهاب
جمهرت ناس ٍ عمرهم مايعرفون الجمهره
ماصرت ذيب إلا لأن اللي تحدوني ذياب
ما كنت أغيب إلا لأن العفو عند المقدره
ترى حلاتك لاحملت لصاحبك كلمة عتاب
أن مانطقت بها بوجهه ماتذمه بظهره
في هالزمن مايملي عيون الحسود إلا التراب
وإلا الحظيظ.. الطلقة اللي ماتصيبه تذعره
ودك اليامن جاتك الغلطة من الناس القراب
الصاحب اللي ماكسبت محبته ماتخسره
الثلاثاء مارس 20, 2007 10:23 am
